Est online su testu de istòria sarda pro sa prima mèdia

Totu sos mastros interessados a faeddare de istòria sarda a sos pitzinnos de iscola dae oe tenent un'istrumentu de prima calidade: unu testu de istòria medioevale sarda pro pitzinnos de prima mèdia.

Sunt 78 pàginas articuladas in 5 mòdulos, cun mapas cuntzetuales, ischedas, mòdulos de verìfica. Las at aprontadas su grupu Storia sarda nella scuola italiana e si podent iscarrigare dae Internet sena pagare nudda.

Unu traballu de prima calidade, duncas, fatu dae unu grupu de autores e mastros chi sunt traballende a tìtulu voluntàriu pro nche fàghere intrare s'istòria sarda a iscola.

Finas a como, difatis, in sos libros de iscola s'istòria de Sardigna no est mentovada mai. Sas pagas bortas chi si nde faeddat b'at informatziones isballiadas (leghe s'artìculu iscritu dae Frantziscu Sanna subra de custu argumentu). Càpitat finas chi in sas mapas sa Sardigna mancu si b'agatet.

Est pro custu chi su grupu Storia sarda nella scuola italiana at comintzadu a preparare materiales didàticos in formadu digitale, chi chie cheret si nde podet iscarrigare dae su situ http://www.lastoriasarda.com/ o dae sa pàgina Facebook issoro sena pagare nudda.

Custu traballu bellu a beru l'ant a presentare su 23 de santugaine a sas 5 de sero in Aristanis (Auditòrium "San Domenico" - carrera Lamarmora). Totu sos mastros e sos amministradores interessados sunt invitados a partetzipare a s'atopu.

Iscàrriga su PDF dae inoghe