Nuraghes e gigantes, difesa contra de su nucleare

08/02/2021 - Ufìtziu De Sa Limba Sarda

Su comitadu "NoNucle NoScorie" at mandadu una lìtera a totu sos sìndigos pro chi sustenent sa proposta de inserire sa Sardigna in sos logos "Patrimòniu Universale de s'Umanidade" de s'UNESCO.

Su comitadu, chi non tenet colore polìticu, in custos annos at coordinadu sas atividades de totu sos Sardos contràrios a su depòsitu de iscòrias nucleares in Sardigna.

In custu momentu chi su perìgulu s'est torrende a manifestare, si sunt ponende in campu istrategias pro lu cuntrastare. Una de custas est de sustènnere sa candidadura de sa Sardigna a Patrimòniu UNESCO, ca su critèriu CA11 de sa Sogin  previdet chi sos sitos patrimòniu de s'umanidade cherent difesos e amparados.

Essende chi sa Sardigna tenet unu patrimòniu archeològicu, istòricu e culturale chi nde faghet unu museu "a cielo aperto", su comitadu esortat totu sos sìndigos a deliberare e (pro chie l'at giai fatu) a integrare sa delìbera sighende su modellu chi est in su documentu allegadu.

(GF.P.)