Eventos in programma
Chenàbura 16 de santandria 2018 su cuncordu Sas Bator Colonnas de Iscanu at a cantare in su 63/o Meeting of the Society for the Ethnomusicology (SEM), s'apuntamentu de etnomusicologia prus importante a livellu internatzionale chi ocannu si faghet in Albuquerque (New Mexico).
Custu eventu est parte de una chirca fata in custos annos dae s'etnomusicòlogu Diego Pani, chi giai in s'editzione 2017 de su Meeting, fata in Denver, aiat presentadu un'istùdiu subra de su cantu a cuncordu de Iscanu.
De Sas Bator Colonnas, unu de sos grupos a cuncordu de sa bidda de su Montiferru, nde faghent parte Antioco Milia (Bassu), Francesco Fodde (Boghe), Antonio Carboni (Mesu Boghe) e Stefano Desogos (Contra), totu giòvanos de pagu prus de trinta annos.
In unu percursu fatu de atopos, laboratòrios e letziones programmadas dae sa University of New Mexico, su cuncordu e s'etnomusicòlogu Diego Pani ant a èssere protagonistas de un'atividade de istùdiu dedicada a sa Sardigna. Pani at a fàghere finas una letzione in su cursu magistrale de etnomusicologia.
Pro nd'ischire de prus podides lèghere sa nova publicada dae Sky tg24 e dae Cronache Nuoresi.