Sa poesia in Sardigna: un'arte sena tempus

Sa vida de sos Sardos est istada semper rica de poesia, "in su gosu e in su recreu, comente in su dolu e in s'anneu"... pro la nàrrere ammentende a Paolo Pillonca, un'òmine mannu de sa terra nostra chi at fatu meda pro contivigiare sa poesia e sa cultura sarda in generale. Intre totu sos traballos suos, ammentamus un'òpera pretziosa pro chie istimat sa poesia e chi amus impreadu meda pro traballos pro s'iscola, presentatziones de seminàrios de poesia e pro aprontare su Power Point chi publicamus in fatu. Si tratat de su libru Chent'annos - Cantadores a lughe 'e luna (Villanova Monteleone, Soter Editrice, 1996).

Sa traditzione de fàghere versos improvisados est un'usàntzia connota in totu su mundu dae tempus antigu. Tenimus testimonias meda de custu, comintzende dae sos poetas grecos e romanos de mìgias de annos in antis de oe, finas a imbàtere a sos tempos nostros. In pagas regiones de Itàlia su sentimentu e s'arte de poetare in limba cun versos armònicos, fortza e gràtzia, s'est isvilupadu comente in Sardigna.

 

Paolo Pillonca tenet su mèritu mannu de nos àere lassadu unu patrimòniu mannu ca pro annos meda at traballadu cun passione faghende chircas e registrende chentinaias de garas poèticas peri sos palcos de totu sa Sardigna. Totu custu materiale pretziosu chi at regortu, ordinadu, catalogadu, como est a disponimentu de totus in "Sa domo de sa poesia cantada", unu museu chi dae inoghe a pagu tempus at a abèrrere in Silanos in sa domo antiga Ajelli posta a disponimentu dae su Comune.

Pro connòschere mègius sa poesia e sas garas poèticas podides abbaidare su Power Point chi agatades a manu dereta.

Si tenides praghere de intrare in su situ de "Sa domo de sa poesia cantada" podides intrare in su situ https://www.sapoesiacantada.it/.

(M.G.S.)