Manifestatziones iscanesas

  • Carrasegare iscanesu
  • Sa Chida Santa
  • Sa Festa (d)e Tota (B)idda
  • Sa Festa Manna


Sa Chida Santa

Lege su programma de sa Chida Santa 2007

Dae oe totu sas informatziones subra de sas Chidas Santas de Sardigna (programmas, localidades, possibilidades de allogiu e ristoratzione) si podent otènnere in s’indirìtzu chi sighit:

Contact Center: 800 88 11 88
Posta eletrònica:
bes@swg.it

Ativos in totu su territòriu natzionale dae su LUNIS a sa CHENÀBURA (9-13 e 16- 19) e su SÀPADU, DOMÌNIGA e FESTIVOS dae sas 10 a sas 13, at a dare informatziones in chimbe limbas (inglesu, tedescu, frantzesu e ispagnolu) pro mesu de tantos canales (telèfonu, posta eletrònica, sms).
Ant a dare rispostas detagliadas in tempus lestru subra de sa Chida Santa de S’Alighera, Casteddu, Castelsardo, Cùglieri, Iglesias, Olìana, Orosei, Santu Lussurzu, Iscanu.

Sa Chida Santa

Sos ritos de sa Chida Santa rapresentant in Iscanu su mamentu prus importante e partetzipadu de totu s’annu litùrgicu.

Comintzant cun sas celebratziones de sa domìniga de Pramma e sighint cun sas funtziones de sa Chenàbura Santa e de sa domìniga de Pasca. In manera particulare sunt sugestivas sas rapresentatziones sacras: cussa de sa Chenàbura Santa chi rapresentat sa passione e morte de Cristos, e cussa de sa domìniga de Pasca inue si rapresentat su ritu de “S’Incontru”, est a nàrrere s’incontru intre Cristos resuscitadu e sa mama.

Custas rapresentatziones tenent orìgines antigas meda ma ant mantesu inalterada totu sa sugestione issoro finas a dies de oe, tantu chi sunt ancora sas prus sìghidas de totu s’annu.

Protagonistas sunt sas tres cunfrarias chi esistint in sa (b)idda: sa Cunfraria de sas Ànimas, sa de su Rosàriu e sa de Santa Rughe (chi li narant fintzas “de Santu Nigola” dae su nùmene de su patronu de su letòriu inue tenet sa sede). Cust’ùltima est sa prus antiga e est cussa chi est delegada a sos ritos de sa Chida Santa. Pro custu motivu su letòriu de Santu Nigola est, paris cun sa parròchia de Santu Pedru, su puntu tzentrale de sos avenimentos de cussas dies.

Sos ritos comintzant sa domìniga in antis de Pasca: sa die si beneighent sas prammas chi sunt istadas preparadas dies in antis dae sos “filadores”, òmines chi cun manu esperta filant sas prammas pro sa (b)idda intrea.

A sa fine de sa beneditzione, chi si faghet in su letòriu de Santu Nigola, si andat in prutzessione solenne finas a sa crèsia parrochiale, pro ammentare s’intrada de Gesus in Gerusalemme.

Su sero de Giògia Santa si tzèlebrat sa Missa in Coena Domini, memoriale de s’istitutzione de s’Eucaristia. In sa Missa su predi torrat a ripìtere sas atziones de Gesus chi aiat samunadu sos pees a sos discìpulos suos in su cenàculu. Sos discìpulos sunt rapresentados dae sos priores e sutapriores de sas tres cunfradias.

Sa paraliturgia de sa Chenàbura si faghet in logos e tempos divressos: “s’Incravamentu” (sa crutzifissione) si faghet in su letòriu de Santu Nigola in forma rigorosamente privada; “s’Iscravamentu” (sa depositzione) si rapresentat in sa crèsia parrochiale in forma pùblica.

“S’Incravamentu” si faghet in Santu Nigola a giannas serradas a pustis de sa Giògia Santa. Bi partetzipant ebia su priore e su sutapriore de sa cunfradia de Santa Ruche. Issos, acumpagnados dae sa priorissa e dae sa sutrapriorissa chi poderant una candela alluta, prelevant cun devotzione manna sa màzine de su Cristos dae su sepulcru inue est custodida e che la leant a su presbitèriu de su letòriu, inue a pees de s’altare est istada giai arrambada a terra sa rughe, e bi assegurant sa màzine cun craos robustos.

Issos si frimant posca in racoglimentu a pregare a costazos de sa rughe. S’altare est adornadu cun “su nènnere”, trigu nàschidu in su bùgiu chi est sìmbulu de sa sepultura de su Cristos.

Su presbitèriu, pro crèschere sa sacralidade de sa tzerimònia, est separadu dae sa restante parte de su letòriu dae una tela manna (“sa Carta”), chi rafigurat iscenas de sa Passione.

A sa fine de sa tzerimònia, sas giannas de su letòriu benint abertas e su Cristos benit mustradu a s’adoratzione de sos cunfrades e de totu sos fideles.

Su manzanu de sa Chenàbura Santa si faghent “sas Chircas”, a inue partetzipant totu sas cunfrarias e sos fideles. Su nòmene in sardu mustrat su coinvolgimentu de Nostra Signora in sa passione de su Fizu (“sas Chircas” difatis cheret nàrrere ‘le ricerche’, e indicat su peregrinare simbòlicu de sa Vìrgine chi chircat su Fizu suferente).

Si che leat in prutzessione sa màzine de sa Madonna Addolorada, in una Via Crucis chi andat peri sa (b)idda e faghet tapa in sos divressos letòrios finas a arrivare a su letòriu de Santu Nigola, da inue ch’essit su Cristos cravadu in rughe. Da innoghe sa prutzessione si aviat a sa crèsia parrochiale inue sa rughe benit elevada in un’ala de su presbitèriu.

Sa chenàbura sero b’est sa paraliturgia de “S’Iscravamentu”, solenne meda. Sos protagonistas de sa depositzione sunt “sos discìpulos”, bator pessonàzos bestidos in costùmenes antigos, chi rapresentant sos discìpulos chi nd’ant caladu a Gesus dae sa rughe e chi l’ant dadu sepultura.

Sos discìpulos comintzant su (b)iazu issoro dae su letòriu de Santu Nigola, chi custoit sos àbidos antigos: a pustis retzitadu un’oratzione (s’“obrigassione”), sos discìpulos acumpanzados dae sa cunfraria andant a sa crèsia parrochiale inue est giai radunada sa populatzione. Si ponent in su presbitèriu paris cun sas tres cunfrarias, e iscultant paris cun su pòpulu sa prèiga de su preigadore. A unu tzinnu sou, a sa fine, acòltziant a sa rughe e nde calant a su Cristos mortu, sighinde cun atentzione sas indicatziones de unu tzerimoniale antigu chi su preigadore ammentat a manu a manu. Su corpus de su Signore, a pustis mustradu a s’Addolorada e a sa zente, benit depostu in “sa letèrna”, una portantina adornada de frores e de candelas.

 

Chida Santa 2007
Programma

 


1 de abrile 2007
Domìniga de Pramma
10:30 Beneditzione de sas prammas in Santu Nigola, prutzessione e Santa Missa in sa crèsia parrochiale.

2 de abrile 2007
Lunis Santu
10:00 - 12:30 Cunfessiones malàidos e antzianos.
16:00 - 18:00 Funtzione penitentziale cun riflessione curtza; cunfessiones de sas fèminas mannas.
18:00 Festa de su Perdonu pro sos pitzinnos de sa 3° elementare e prima cunfessione.

3 de abrile 2007
Martis Santu
10:00 - 13:30 Incontru cun su Padre Missionàriu pro sos pitzinnos de s’iscola elementare; riflessione pascale e missionaria; cunfessiones.
16:00 Cunfessiones de sos òmines mannos.

18:00 Riunione pro sos giòvanos in parròchia.

19:00 Funtzione penitenziale cun riflessione curtza; cunfessiones de giòvanos e de òmines mannos.

4 de abrile 2007
Mèrcuris Santu
8:45 Cunfessiones de sos pitzinnos de sa 1° e 2° mèdia.
10:00 Pretzetu pascale de s’iscola materna, elementare e mèdia.
11:30 - 13:30 Incontru cun su Padre Missionàriu pro sos pitzinnos de s’iscola mèdia.
16:00 Cunfessiones de òmines e fèminas mannas.
18:00 Catechesi, funtzione penitentziale e cunfessiones de sos chi si devent cresimare.

5 de abrile 2007
Giògia Santa
8:00 Funtzione comunitaria, in crèsia, de s’Ufìtziu de sas Leturas e de sas Laudes matutinas.
10:00 Santa Missa de su Crisma in sa Catedrale de S’Alighera.


TRIDUU DE PASCA

5 de abrile 2007
GIÒGIA SANTA
17:00 Cunfessiones.
18:30 Santa Missa in coena Domini.
22:00 Ora Santa.

6 de abrile 2007
CHENÀBURA SANTA - Diunzu e astinèntzia
8:30 Funtzione comunitària, in crèsia, de s’Ufìtziu de sas Leturas e de sas Laudes matutinas.
9:00 Cunfessiones.
10:30 Sas Chircas; Via Crucis intro de (b)idda.
12:00 Elevatzione de sa Rughe.
16:00 Adoratzione de sa Santa Rughe.
20:00 S'Iscravamentu: prèiga, depositzione e prutzessione cun su Cristos mortu, a cara a Santu Nigola.

7 de abrile 2007
SÀPADU SANTU
8:30 Funtzione comunitària, in crèsia, de s’Ufìtziu de sas Leturas e de sas Laudes matutinas.
9:00 Comunione de sos malàidos e de sos antzianos.
16:30 - 18:30 Cunfessiones.
22:00 Veglia solenne de Pasca.

8 de abrile 2007
DOMÌNIGA DE PASCA
10.30 Prutzessione de S’Incontru e Santa Missa in crèsia

BENEDITZIONE FAMÌLLIAS

Mustra de sa Chida Santa

Costùmenes de sos discìpulos
Àbidos de sas cunfrarias
Riprodutzione de sos ritos
Espositzione de su Cristos depostu dae sa rughe
Arredos
Mustra de fotografias
Paramentos e arredos sacros


Biblioteca comunale
Abertura: ogni die de sa Chida Santa
dae sas 10.30 a sas 13.00
dae sas 17.00 a sas 22.00