Campadora
Sa limba sarda in una poesia mandada a su cuncursu "Antoni Piludu"
17/11/2009 - Ufìtziu De Sa Limba SardaIn una de sas poesias mandadas a su cuncursu "Antoni Piludu" si bi mentuat sa limba sarda.
Sa poesia, arribada anònima pro isbàlliu, est de su poeta Michele Podda de Ollolai-Casteddu.
Foras de carchi imprecisione (su Gadduresu no est una variedade de su sardu) su poeta narat una cosa importante: chi su sardu est unu ebia, e chi no est beru chi sos Sardos non si cumprendent a pare.
Sas paràulas "no cherimus chi niunu / si ponzat limba noa a imbentare" sunt fortzis riferidas a sa Limba Sarda Comuna, chi est sa proposta de unificatzione gràfica fata dae sa Regione in su 2006.
Un'unificatzione gràfica, però, est de importàntzia manna si si cheret dare a sa limba sarda sa fortza chi tenent totu sas àteras limbas de su mundu, chi pro s'iscritura tenent una forma ebia e duncas la podent impreare pro ogni cosa e in ogni cuntestu.
Campadora (de Michele Podda)
Die bona non t’as a bider mai
limba sarda istimada moribunda,
da continente est arribada un’unda
chi, tenta a tzugu, t’est ochinde jai,
prenèndeti sa buca est azumai
s’italianu, che una pedra tunda;
non bi campas pius abbisu meu,
morzende ti nde ses, non cherzat Deu!
Ite bellesa su chistionare
a sa moda de donzi biddighedda
de donzi tzitadina, manna o dedda,
chi duas non bi nd’at a un’andare!
Si la cheres istrocher e brullare
tando donz’una pìgala e faedda,
totue issa t’alligrat su coro,
Gaddura, Campidanu o Logudoro.
A l’ischis ite narat calicunu?
“Sos Sardos non si cumprenden a pare”!
Chi morzat e non torret a pesare
cumente est beru chi su sardu est unu!
Pro cussu no cherimus chi niunu
si ponzat limba noa a imbentare;
a chie cheret l’agatat totue,
si no bi la naramus deo e tue.
No! Non ti moris, ca non ti lassamus
a ti ghetare a terra s’inimigu,
cussu chi paret bellu che isprigu
non binchet, ca sas trassas li ogamus,
fronte a s’italianu li paramus
ponende su limbazu nostru antigu;
si podimus mantenner issu fora
tue torras in trassa, campadora!