Predas chi faeddant
S'istòria de Sardigna in sa poesia premiada in su cuncursu "Antoni Piludu"
26/11/2009 - Ufìtziu De Sa Limba SardaSos crastos antigos de sos nuraghes sunt sos protagonistas de custa poesia de Mimiu Maicu de Santulussurzu, intitulada "Predas chi faeddant".
Sunt sos crastos, testimonzos mudos, chi ammentant sèculos de istòria insambenada e de eroismos disconnotos.
Predas chi faeddant de Mimiu Maicu
In s’al’ ‘e su nuraghe
boghes misteriosas
paret chi nerzant: “frimed’a pasare.
non seghes su tenaghe
ch’ancor’a custas losas
ti tenet presu, tepes iscultare
peràulas de paghe,
pustis de dolorosas
cuntierras chi, malas a sanare,
ant causadu dolu
e postu custu logu in disconsolu”.
“A dd’intennes su ‘entu?
Lizer’in custu pranu
nos carignat, nos basat cun amore,
cun d’unu trazu lentu
n’attit da log’arcanu
càntigos de tristur’e de dolore,
fortzis est su lamentu,
s’ùrulu disumanu
de fèminas violadas, su terrore,
su luttu de sos coros
po s’assacheu ch’ant fattu sos moros”.
Custos crastos antigos
ant bidu s’accunnortu,
pois de tantos, troppos invasores;
de su mar’inimigos
e Ampsìcora mortu
po che trazar’a Roma sos laores.
Cantos faltzos amigos
approdant a su portu
retzidos cun inchinos e onores:
non ne cumprint promissa
e custa terra semper suttumissa!”.
Cantas delusiones
ses patinne ancora...
pentzo chi ne cumbenzas tue puru;
ma cuddas ‘isiones
bellas d’Eleonora
ancora lughe faghent in s’iscuru
e lìberas cantzones
in preda sonadora
amus imprimer de basaltu duru
po chi diventent veras
de pagh’e de riscattu sas isperas”.