Parcu àrcheo-ambientale de su Riu Mannu

Lunis 28 de ghennàrgiu 2019 in Milis su Comune de Iscanu at a firmare su protocollu de intesa pro su progetu de isvilupu territoriale de s'Unione de sos Comunes de Montiferru-Altu Campidanu.

Su progetu, intituladu "La Sapienza del villaggio", cuntenet sa proposta fata dae su Comune de Iscanu (promotore de s'initziativa paris cun sas Amministratziones de Sinnarìolo e de Tresnuraghes) pro unu parcu àrcheo-ambientale de su Riu Mannu, chi movende dae Santu Antiogu potzat imbàtere a su mare de Foghe passende peri su Riu Mannu.

Pro cantu atenet a Iscanu, s'ant a pòdere bisitare sa bidditzola de Santu Antiogu "de sas Benas", sos mòlinos de abba antigos (percursu "La Via dei Mulini") e su nuraghe Nuracale chi est unu de sos prus bellos de sa zona, cun sas bator turres suas.

S'idea est de creare isvilupu movende dae sas resursas de su territòriu, chi ant a èssere postas a postu e valorizadas.

Su percursu l'at a gestire una cooperativa de comunidade locale.