S'umbra

Traditzione e tecnologia a cunfrontu

03/12/2009 - Ufìtziu De Sa Limba Sarda

Traditzione e modernidade a cunfrontu in custa poesia de su poeta durgalesu Gonario Carta Brocca (3° prèmiu ex aequo in su cuncursu "Antoni Piludu 2009").
 
In unu mundu chi curret lestru in labirintos digitales, dòminadu dae sos mèdios eletrònicos chi a bortas impresonant s'òmine in unu tempus indefinidu che umbra, su poeta s'intèrrogat subra de su sensu de sa vida, ammentande a chie leget chi "totu, a su comentzu fin a mesura d'òmine sas cosas".
... E como?
 

S’umbra de Gonario Carta Brocca

Frimu su coro miu
in sa terra ‘e sos mannos;
terra d’iscras e preda
surcada da’ invasores elettronicos
chi totu istramùdin:
meres de pessos lestros
d’allegas tirriosas
de su nudda de plàstica
ue su tempus si parat
ue su tempus est umbra
e morte e vida
s’ifranchian a pare
crochinde pantamas
chi colan sos sentidos
in chilivros digitales.
 
Unu bisu so chircande
e sonos de paràulas
chi tocain orizontes isconnotos
àidos aperinde
interi chelu e terra
cando terra fit su chelu
e chelu e terra sònniu e passione.
 
Totu
a su cumentzu
fin a mesura d’òmine sas cosas
ma como
istranas parpàines an ghetau
in chirca de soles noales.
 
In labirintos de terabyts
e avrinzos passizeris
òmines de carre
perden su passu
chircande su segretu
de sas cosas sinnadas
dae su còditze a sias
e illuinaos
su nùmeru ‘e s’ànima baratan
a cambiapare ‘e siendas caminantes.
 
Dillìrios d’assolutu
m’imbriacan de un’ùrtimu sònniu.