Pro totu sos amantiosos de sa limba sarda, pro chie cheret imparare a iscrìere ma non tenet tempus de partetzipare a sas letziones, pro chie cheret connòschere mègius comente funtzionat sa limba nostra, giòbia chi benit in Iscanu amus a presentare "Dischente", su primu cursu e-learning in limba sarda.
Aprontadu dae sa Provìntzia de Aristanis in collaboratzione cun s'Universidade de Casteddu e su Tzentru de Servìtzios Culturales UNLA de Aristanis, "Dischente" est unu cursu on-line chi si podet fàghere dae domo cun àsiu e sena pagare nudda.
Finidu su cursu, onni dischente podet dare s'esàmene e leare s'atestadu.
In s'atopu de giòbia (10 de santuaine) amus a presentare custu cursu e ispiegare comente funtzionat.
Chie totu est interessadu a partetzipare si podet presentare a sas 3 (h 15,00) in s'àula de su Consìgiu de su Comune de Iscanu.
Pro partetzipare non si pagat nudda e non b'at bisòngiu de s'iscrìere in antis.