Iscòrias nucleares. Sa Regione aiat naradu chi NONO giai in su 2003

Pro sighire s'arresonu in contu de iscòrias nucleares, publicamus sa Lege regionale n° 8 de su 3 de  trìulas de su 2003, in ue sa Regione decrarat chi sa Sardigna est territòriu denuclearizadu e "precluso al transito ed alla presenza, anche transitoria, di materiali nucleari non prodotti nel territorio regionale".

A pustis de custa lege (publicada in su B.U.R.A.S. n° 20 de s'8 de trìulas de su 2003), in su 2011 b'at istadu unu referendum in ue su 97,64% de sos Sardos at naradu chi sa Sardigna non cheret nen tzentrales ne iscòrias nucleares.

Paret impossìbile chi cun custos resurtados (chi diant pàrrere definitivos e foras de cuntestatzione) custu problema siat torradu a essire a pìgiu. A dolu mannu de sos Sardos imbetzes est gasi, difatis sos Comitados Si.nonucle e Noscorie si sunt ativados pro sensibilizare sa gente e sos Amministradores locales.

Comente amus iscritu sas dies passadas in s'artìculu Montresta delìberat contra a sas iscòrias nucleares, 250 sìndigos ant votadu unu documentu de s'Anci chi ponet in craru chi sos comunes sardos non dant disponibilidade a ospitare iscòrias radioativas, e sos Cussìgios comunales de biddas meda si sunt ativende pro deliberare contra a custa prepotèntzia.

Si b'at carchi Comune chi est interessadu a deliberare, podet iscarrigare comente modellu sa delìbera de Montresta chi s'agatat in s'artìculu.

Pro tènnere carchi informatzione in prus in contu de su referendum de su 2011 podides lèghere inoghe (Il Fatto Quotidiano) e inoghe (Sardegna.Blogosfere).