Sit-in contra de sas iscòrias nucleares

Sos comitados NoNucle-NoScorie ant fissadu pro s'1 e 2 de abrile unu sit-in de fàghere in Casteddu in dae in antis de su palatzu regionale de carrera Roma.

Su 2 de abrile, difatis, at a essire s'elencu ufitziale de sos sitos destinados a depòsitu ùnicu de iscòrias radioativas. Sa Sardigna, essende chi tenet istabilidade geològica, pagos abitantes e chi nch'est a tesu dae Itàlia, paret chi siat su logu prus adatu a nch'interrare 75 mìgia metros cubos de iscòrias nucleares chi ant a abarrare radioativas nessi pro 300.000 annos, trasformende sa terra nostra in una polveriera destinada a nch'interrare ogni economia agrìcola e turìstica e a trasformare sa Sardigna in obietivu militare sensìbile in casu de gherra.

Sos sardos aiant giai naradu unu "nono" firmu (97% de sos votantes) in su referendum de su 2011, e finas sa Regione paritzas bortas at dadu parre contràriu (L.R. 8/2003 e àteros documentos de su Cussìgiu regionale), talis chi non si cumprendet pro ite cada tantu custu problema si torrat a presentare.

Su perìgulu est tropu mannu e su pòpulu sardu est cramadu a si mòvere pro difèndere sa Sardigna dae su perìgulu mannu chi est aminetzende sos fìgios suos.

Su sit-in tenet custos oràrios:

- 1 de abrile: dae sas 5 de sero (h 17,00) a mesanote (h 24,00) cun interventos, ispetàculu e mùsica;

- 2 de abrile: dae sas 9 de mangianu finas a cando non s'at a tènnere novas.

Pro nd'ischire de prus si podet iscarrigare su depliant informativu preparadu dae sos comitados.

Si carchi Comune no at ancora deliberadu su "nono", podet iscarrigare su modellu de delìbera dae inoghe.