Su 28 de santandria unu cunvegnu pro faeddare de sa ratìfica de sa Carta europea de sas limbas minoritàrias
26/11/2014 - Ufìtziu De Sa Limba SardaChenàbura 28 de santandria a sas 4 e mesa (h 16,30) in su Palatzu vitzerègiu de Casteddu b'at a àere unu cunvegnu importante meda pro su benidore de sa limba sarda.
In custu cunvegnu, promòvidu dae sa Fondazione Sardinia, s'at a tratare de sa ratìfica de sa Carta europea de sas limbas regionales o minoritàrias e s'ant a analizare sas lìnias noas de sa polìtica linguìstica in Sardigna.
A s'addòbiu b'ant a partetzipare senadores e deputados de sa Repùblica, cussigeris regionales, dirigentes de partidos polìticos, òmines de cultura, assòtzios, operadores de limba sarda.
S'iscopu est de abèrrere una mesa de cunfrontu e coordinamentu intre rapresentantes de sas fortzas polìtica sardas pro istudiare istrategias de traballu pro sa tutela de sa limba sarda e pro connòschere sa polìtica linguìstica noa adotada dae sa Regione e cuncordare in manera partetzipada sas lìnias de interventu.